Post 66 Diltu 1323!

Tarik Ni 20/Vau Thla/Kum 2012:
MAMIT: SSA-in Mamit District chhung khaw hrang hranga P/S leh UPS Zirtirtu 65 a lak turah Diltu 1296 awmin, Accountant-cum-Support Staff hna 1 (pakhat) lak turah diltu 27 zet an awm bawk a, hengmite hi nimin atang khan Interview hmachhawn tir tan an ni.

SSA Mission hnuaia Mamit District chhung Sikul 26-a Zirtirtu Post 65 hnawhkhahna tur hian mi 1296 zetin dilna thehlutin, Primary School (P/S) teacher post 26 (Sikul 13) hnawhkhat turin mi 881-in an dil a, Upper Primary School (UPS) teacher post 39 (Sikul 13) hnawhkhahna turin mi 415-in dilin, BRC, Zawlnuama Accountant-cum-Support Staff hna 1 inchuhin mi 27-in an dil bawk.
Nimin khan heng hna diltute hi DPO, SSA Mission, Mamit District-ah Interview leh Written Exam neihtir an ni a, nimin leh vawiin hi PS Teacher diltute interview hun atan ruahman niin, naktuk hian UPS tea cher leh Accountant-cum-Support Staff hna diltute’n interview leh written exam hi an hmachhawn ve leh thung ang.
SSA hnuaia th awh tur heng hna ruak 66 hnawh khahna’na diltu 1323 (teacher 1296 + Accountant 27) te hi Mamit khawpui chhung leh District chhung khaw hrang hranga mite bakah Aizawl leh District hrang hranga mi an ni hlawm a, Lunglei leh Saiha lam atang pawhin mi engemaw zatin rawn dilin, Mizoram chhung District 8 atangin an kim vek a ni.
Heng hnaruak hnawhkhah turte hi District chhung khaw kilkhawr tak taka P/S leh UPS hawn thara mi tur niin, PS teacher hi `20000/- (fixed) hlawh tur an ni a, UPS teacher leh Accountant-cum-Support Staff te hi `25000/-(fixed) hlawh tur an ni.
An thawhna tur sikul te:
Primary School (Post 2 zel)=Bazirungpa Veng, Kolalian, Luimawi Vai veng, Aivapui, Sotalui, Boralui, Bekka Bekkya, Chuhvel Leilet, Saikhawthlir Leilet, Sihthiang, Thaidawr, Zomuantlang, Kadamtuli.
Upper Primary School (Post 3 zel)=Luimawi Vai veng, Chuhvel Leilet, Saikhawthlir Leilet, Aivapui, Zopui, Satalui, Boralui, Bekka Bekkya, Dampui veng, Kashmir, Dampa Zodin Veng, Bazirungpa Veng, Kolalian.

Comments

Popular posts from this blog

Lirthei 1712 Registered

B.TEII HOVIN INDIA TEAM