Mamitah PRISM (Mamit Dist-ah Eirukna.etc..)

Tarik Ni 22/Vau Thla/Kum 2012:
MAMIT: Nimin khan I&PR Conference Hall, Mamitah PRISM buatsaihin District chhung hmasawnna hnathawh dan thlirhona leh sawihona hun hman a ni a. Hetah hian, Bawngva khuaa BNREGS building sak chungchang leh Tui puibari-a sum luangral ni a hriatah thil dik lo titute lakah thubuai rip tak a inmun chho tan mek tih tarlan a ni.

PRISM Sub-Hqrs. Mamit buatsaihin nimin khan I&PR Conference Hall-ah District Level Development Consultation Programme hman a ni a. Hetah hian PRISM headquarters President Pu Vanlalruata leh hruaitu dangte’n rawn hmanpuiin, PRISM President chuan, Mamit District chhung, Bawngva khuaa BNREGS building sak, building thar sa lova a hlui thawmthat, senso ngai reng tho si chungchanga FIR an thehluh chu a nihna dik tak a lan chhuah tan thu a sawi a, he thilah hian eirukna a awm ngei tih a lanchian tan tawh thu sawiin, ‘Cashier-in cheng sing 7 a rawn dahlet ring awt tawh a, midang, tute emaw chuan an dahlet ve leh maithei a ni?’ a ti a, ‘Bawngva khuaa BNREGS building sak chungchangah hian cheng nuai 2 chuang vel zet eirukna awm angin Case a kal dawn a ni’ a ti bawk.
PRISM President chuan, Tuipuibari-a hmasawn na hna thawhnaa cheng nuai 40 chuang vel zet eirukna awm anga hriat chungchangah pawh file a kal mek thu sawiin, ‘Tuipuibari-ah hian sum sen zat leh hnathawh intu lo lutuk, cheng nuai 40 chuang vel zet tur sum luanralna a awm niin kan hria a, ACB-ah FIR kan thehlut tawh a, reiloteah chuan a rawn lanchhuah mai a rinawm khawp mai’ a ti a, Mizoram Budget-ah mipuite’n chan an neih tlem takzet thin thu sawiin, ‘kan Budget-ah hian zaa 17.28 (17.28%) vel chauh hi mipuite chan a ni a, heta tang hian engemaw zat chu eirukah a’n ral leh a, kan chan tak tak chu zaa 10 bawr vel bak a ni pha lo a ni’ a ti a, ‘kan hotute hian chhiah pe tlem em em ang tein min sawi thin a, chhiah kan pek dan hi mipuite hian kan hre lo a ni, India ramah chhiah pe hnem ber kan ni zawk’ tiin, ‘eng thil pawh lei ila, cheng khat man thil kan lei pawhin a leitute hian chhiah kan pe zel a ni’ ‘Sawrkar hian a hranin pawisa a nei lo, kan chhiah tlingkhawm hmanga kal mai a ni’ a ti bawk.
Pu Vanlalruata chuan, ‘awihawm loh khawpa thil tenawm, mahse ni tlat si a awm a, tunah hian Mizoramah Sawrkar hna zuar an awm tih hi a ni’, tiin, ‘tun mai (nimin chhun dar 11:30 vel) khan ACB te’n heng Sawrkar hna zuar zinga pakhat chu an man ta tih min rawn hrilh a, Electric Department-a thawk tura zuartu a ni awm e’ ‘hetianga sawrkar hna zuartute hian department hrang hranga thawk turin hna an zuar a, an hralhnate hnen atangin pawisa la in, a leitute pawhin hna chu an hmu mai thin a ni awm e’ a ti a, ‘he thil hi a inphum thuk viau a rinawm a, tute emaw department hrang hranga mi inthlunzawm/thawkho an awm a nih a rinawm’ a ti bawk.
PRISM Hqrs. Treasurer chuan, ‘Mizoram sawrkar hnathawk zingah department tinah hian thawk miah lova hlawh la mi 30 vel zel ang an awm a, Mizoramah department 49 awmin, belhkhawm ila a tam lutuk tlat’ a ti a, ‘tunah hian Sawrkar hnathawk zingah eirukna vanga Jail tang ngei ngei tur 297 an awm mek a, mak tak maiin tumah an tang tlat lo, misual hrem ngam Sawrkar kan mamawh takzet a ni’ a ti.
He hunah hian rawtna leh ngaihdan sawihona neih a ni a, kalkhawmte atangin Mamit District chhung hmasawnna tura an duhthusam leh eirukna umbo tura rawtna an neihte sawihovin, an ngaih pawimawh zual zingah; State Capital Aizawl atanga engkim kalpui lova, District a nihna anga function tir a, thuneihna sang zawk neihtirte, Mamit khawpui hmasawnna’n tuna VC hrang hrang neih fir fer ai chuan Municipal Council din mai zawk te, hmasawnna hna a kalrual theihna’n leh inthlauhthlakna a awm lohna’na District Council neih mai te, chu thusawi langsar zual an ni a, Mamit District-ah Bru hnam an tam thu leh Tripura atanga hruaichhoh belh zel an nih avangin nakinah chuan Tuikuk (Bru) MLA kan la neih mai an hlauhthawn thute sawiin, hemi kawngah hian Politician te mawh a sang hle ni a an hriat thu an sawi a ni.
Inkhawm hi Robert Zoramliana, Vice President, PRISM Sub-Hqrs. Mamitin kaihruai in, khawpui chhunga NGO hruaitute leh thuthar thehdarhtute sawm an ni a, zawhna chhangin PRISM Hqrs. President chuan, an pawl inrelbawlna sum leh pai hmuh danah hman sen loh an hmuh thu sawiin, Sawrkar laipui leh ramdang Embassy atangte, leh hmun hrang hrang atanga sponsoreship an hmuh thin thu a sawi a ni.

Comments

Popular posts from this blog

B.TEII HOVIN INDIA TEAM

Vawiin Lentupui...