CM-in Sub-Hqrs. YMA Ngenna Pawmsak

Tarik Ni 26/Vau Thla/Kum 2012:
MAMIT: Mamit khawdai paltlang tur National Highway laih hna thawh mekah Sub-Hqrs. YMA Mamitte’n Chief Minister hnena an ngen angin ruahmanna awmsa tih danglam a ni dawn a, Dapchhuah atanga Mualpui penga rawn chhuak chho lovin, a piah, Pu Mawithanga Huanah rawn chhuah phei tir tum a ni.

Dapchhuah atanga Mamit khaw luh hma, Mualpui penga rawn chhuak chho turin National Highway hi kaltir tum a ni a, hei hi Sub-Hqrs. YMA Mamit chuan tha ti lovin, helaia a rawn chhuahchhoh chuan a chho ulhin, beisei ang a pha dawn lo nasa niin an hria a, Zongaw (Dampui ngaw)-a thing leh mau a sutchhiat tur zat thuhmun rau rauah zawl/zal nuam leh tha zawka tih dan a awm ang, tiin Chief Minister hnenah lehkha an thehlut a, an ngenna hi CM chuan tihhlawhtlin sakin, Kawng hi zawn that (Re-Survey) leh a ni dawn a ni.
Chief Minister thuchhuak anga helai kawng laih tur hi tihdanglam a nih dawn tak avang hian Sub-Hqrs. YMA chuan Dapchhuah atang hian Mualpui peng piah, Pu Mawithanga Huan (Ruotmawii hmuah kawn) ah rawn chhuak phei se an ti a, he an ruahmanna hi Highway hotute leh kawng laitu Company te nen pawh an la enho dawn a ni.
Helaia National Highway kaltir tur hi ruahman dan/ruahmanna hmasa ang chuan Dapchhuah atanga rawn kalin, Mamit thlen hma, Mualpui pengah a rawn chhuak chho anga, kawngpui awmsa rawn zawh pheiin, Luangpawl veng hnuaia Horticulture Limk Road-ah a peng thla leh anga, Mamit khawpui chhung lut lovin khawthlang lamah a kal thla dawn a ni.
Inrinnia kawng thar tur ena Sub-Hqrs.YMA, Mamit hruaitute thawkchhuak hi mi 12 zet niin, Pu Mawithanga Huana rawn chhuak phei tur hian a riruang an va duang a ni.

Comments

Popular posts from this blog

Lirthei 1712 Registered

B.TEII HOVIN INDIA TEAM