Chanchin Hrang Hrang...

Tarik Ni 19/Vau Thla/Kum 2012:
Govt.Mamit H/S Champion:
MAMIT: Mamit District Secondary School Games vawi 11-na, kar kalta thawhlehni atanga neih chu Inrinni khan zawh fel a ni ta a. A pumpuiah Govt. Mamit High School chu Pakhatna niin, Pahnihna Govt. Kawrtethawveng High School, Pathumna St.Francis Xavier H/S, Kanhmun an ni.
District chhung High School 19 zette telna he Secondary School Games hi Mamit Khelmualah neih a ni a, thawhlehni khan Mamit DC-in hawngin,
inrinni khan Pu Laldangliana, DEO Mamit Dist-in a khar a. Kharna inkhawmah DEO chuan thu sawiin, zirlaibu chhung ngawr ngawr bakah infiamna lam chu ngaih pawimawh chhoh deuh deuh a nih thu a sawi a, tun tuma ti thate chu State dangah Excursion neihpui an nih dawn thu leh hei hi chhunzawm zel a nih dawn thu a sawi a. Kharna inkhawm hi Pu Mickey R.Lalenkawla, SDEO, Mamitin kaihruai in, DEO hian lawmman a sem nghal a ni.
11th Secondary School Games hi Ni 4 chhung (Thawhlehni atanga Zirtawpni thleng) neih tura ruahman a nih laiin zawh hman a nih tak loh avangin Inrinni khan chhunzawma zawh fel a ni a, Infiamna items chi hrang hrang (Athletics, Volleyball, Football, Rifle Shooting, Table Tennis, Badminton) ahte zirlai 800 vel zetin inelna hi an nei a. A pumpuiah Govt. Mamit High School chu pakhatna niin, Govt. Kawrtethawveng High School chu PAHNIHNA an ni a, St.Francis Xavier H/S, Kanhmun chu PATHUMNA an ni.
Mimala point hmu sang ber, “Best Athletes”, Mipaah Moses Lalthangzuala, St.Francis Xavier H/S, Kanhmun niin, Hmeichhiaah Lalhlimpuii, Govt. KR H/S, Zawlnuam a ni.

Khawthlangah Lal Thanzara:
MAMIT: Parliamentary Secretary Pu Lal Thanzara chuan Ningani liamta khan Luimawiah Langkaih Group YMA Conference hmanpuiin, hemi hma Nilaini khan Chhawrpial Group YMA Conference a hmanpui a, Chhawrpial Gr.YMA Silver Jubilee Lungphun a hawng bawk. Pu Lal Thanzara hian Pukzing khua pawh tlawhin, W.Phaileng to Marpara Kawng siam mek a en nghal a, a haw pahain Bairabia Tlawng Lei dawh mek a en nghal bawk.

Gas harsatna chungchang sawiho:
MAMIT: Mamit District chhungah Mizofed hnuaiah Eirawngbawlna Gas Connection nei 5075 an awm laiin, thla khatah Bur 2142 vel chauh a rawn thleng thin a, Gas hnianghnar zawk a awm theih na’n thuneitute hnenah thlen tum a ni.
Nimin chhun dar 1:00 pm khan District Bawrhsap Pu Rodney L.Ralte, IAS hovin a office chamber-ah Mamit District chhunga Eirawngbawlna Gas harsatna chinfel dan tur sawiho a ni a. Hetah hian Mamit khawpui leh District chhunga Eirawngbawlna Gas harsat dan sawihovin, Mamit District chhungah hian MIZOFED hnuaiah Gas Connection nei 5075 an awm mek laiin thlatina Gas lo thleng thin chu Truck trip 6-7 inkar, Bur 2142 vel chauh a ni a, hei hian mamawh a phuhru zo lo hle a, Mamit District chhungah Gas a hnianghnar theihna turin tan lak nise an ti a, hemi chungchang hi thuneitute hnenah thlen nise, tiin, mawhphur turin DC an ruat a, Gas te hi a lo thlen apiangin mawhphurtute’n lo buk thin tawh se, Meeting chuan a ti a ni.
Meeting-ah hian tel tura tih khawpui chhung VCP te, Sub-Hqrs. YMA, MHIP, MUP, MJA, Consumer Union, Mizofed leh Supply Department aiawh te an tel a ni.

Thinghlunah free clinic:
MAMIT: Samaritan Society of Mizoram, Mamit leh District Hospital-a MMU te tangkawp chuan zirtawpni khan Thinghlun khuaah a thlawna inentirna va buatsaihin, mi 120 chuang an inentir.
Tum danga an lo tih thin tawh ang in Samaritan leh Mamit Damdawi Ina MMU (Mobile Medical Unit) tang kawpte hian Mamit District chhung Thinghlun khuaah hian a thlawna inentirna (Free Clinic) an buatsaih bakah hian a thlawnin Damdawi an sem nghal a, Mamit atangin Doctor pahnih; Dr.Hrang kapzawna leh Dr. Hmingthansangate hovin Damdawi nen thawkchhuakin, damlo inentir 120 vel zingah hian Pum lam tha lo, Mit (Eye) leh hritlang awmna an tam deuh ber niin thu dawn a ni a, natna khirhkhan em em an awm lo niin thu dawn a ni.

Comments

Popular posts from this blog

Lirthei 1712 Registered

B.TEII HOVIN INDIA TEAM