RAM TIN 2200 HMUN KANGRAL!

Tarik Ni 7/Ramtuk Thla/Kum 2012:
Mamit: Nikum 2011 khan Mamit District-ah Lo hal vangin hmun 49-ah kangmei a chhuak a, ram tin 130 hmuna zau ram kangin, fimkhur loh avangin hmun 11-ah ram a kang a, tin 2200 hmun zet tihkan a ni bawk!.
Tunkar (Ni 3 - 10 Feb.) chhunga hman tur Kangmei Ven Hapta (Fire Prevention Week) nimina Chhim Veng YMA Hall, Mamita hawnna inkhawmah hemi chungchang hi tarlan a ni a. Pu Lallianzuala, DFO, Member Secretary, District Fire Prevention Committee-in report a pek atanga a lan danin, nikum 2011 khan Mamit District-ah lo hal vangin hmun 49-ah kangmei a chhuak a, ram tin 130 hmun laia zau ram tih kan niin, nikum 2011 vek khan fimkhur loh avangin hmun 11-ah ram a kang a, tin 2200 hmun zet tihkan a ni bawk. Pu Lianzuala chuan, kumina ram tikang lo tura District Level Fire Prevention Committee-in hmalak a tum dan sawiin, kangmei venna kawnga hnathawk tha khua 3 (pathum) thlan an nih dawn thu leh ram tikang nasa khua 5 (panga) thlanchhuah a, dan dinglai hmanga hrem an nih dawn thu a tarlang a ni.
Hawnna inkhawm Pu Zatluanga Sailo, President, Sub-Hqrs. YMA Mamit kaihhruaiah thusawiin Hapta hawngtu District Bawrhsap District Bawrhsap Pu Rodney L. Ralte, IAS chuan kumtina ram kan la tih kan thinna chhan chu ram kang pawizia leh thing leh mau hlutma kan la hriat tawk loh vang ni a a hriat thu sawiin, hemi kawngah hian Zoram mipuite kan thanharh a hun tawh hle a ni a ti.
Khuallian chuan ram kang venna leh ram humhalhna dan fel tak sawrkarin a neih thu tarlangin, ram ti chereu leh tikangtute chu dan anga hremna an chungah lek theih a nih thu te, Mamit District-ah phei chuan hei hi lekkawh a nih tur thu a sawi a, chutianga dan lekkawh ngai lo tura hma la tur leh fimkhur turin khawtina V/C te leh tlawmngai pawlte bakah District chhunga mipuite a sawm a ni.
Khuallian District Bawrhsap Pu Rodney L. Ralte chuan ram kangin chhiatna a thlen dan hrang hrang te tarlangin sawrkarin NLUP a kalpui mek hi intodelhna tha tak a nih piah lamah kangmei laka kan himna tur pawimawh tak a ni a ti bawk.
Ram kang venna kawnga hmalakna chikhat, Middle School leh High School naupangte tana buatsaih Painting Competition leh Slogan Writing Competition a lawmawm te he hunah hian sem a ni a, Slogan writing competition ah 1st Z. Lalchunglura, Zion Veng Mamit Rs. 1,000/-, 2nd Lalnunmawia High School Veng, Mamit Rs. 750/- leh Angela Lalrinchhani Zion Veng Rs. 500/- hlan an ni a. Painting Competition Middle School Section ah 1st Lalruattluanga Sailo Cl-VIII St. Francis of Assissi School Rs. 2,000/-, 2nd V.L. Hruaizela, Cl-VIII St. Francis of Assissi School Rs. 1,500/-, 3rd Laldingngheta Cl-VIII Govt. M/S III Rs. 1,000/- niin High School Section ah 1st Aldrin Lalchhanchhuaha, Cl-IX New Mamit Sec. School Rs. 2,000/- 2nd C. Zomuansanga Cl-IX St. Francis of Assissi School Rs. 1,500/- leh 3rd V.L. Hmangaiha Cl-X Govt. H/S School Mamit Rs, 1,000/- te hnenah hlan an ni a, Lawmman hi khuallian District Bawrhsap-in a sem a. He hunah hian Head of Offices, NGO hruaitute leh School naupang thahnem tak an tel a ni.

Comments

Popular posts from this blog

Lirthei 1712 Registered

B.TEII HOVIN INDIA TEAM