Deadline Transfer

Thawhtan zan, thawhlehni zing a ni mah tawh zawkah khan Premier Leaque Club hrang hrangte chu Player inchuhin an insulpel suau suau a. Chhan hrang hrang vanga player inlehburhna boruakah ‘a chhan leh vang’ in ang lo zet zetin Club te’n player an in pass kual a, last minute a nih tawh avangin Media ho pawh hmun khata awm hle hle thei an ni lova, Car chhung leh hnim phen atanga thlalakna nena lo biru ngat ngat mai, media person ho zingah an kat nawk a ni.

Keini tana thawhtan zan, zan rei/thawhlehni zing dar 4:30 vel thleng kha transfer window an hawn theih hun tawp a ni tawh a, hemi hnu lamah chuan kawngkhar kharin, a chhunga lut hman ang angte’n inbuatsaihna an kalpui chhoh tan a ngai dawn a ni. Last minute tak taka indawr fel chauh hi club lian zingah an awm nawk a, a lar zual zingah Fernando Torres te, Andy Carroll, David Luiz, Suarez te insuankual hi a lawk zual an ni.

Chelsea-ah Torres: Torres-a’n pound maktaduai 50-in Chelsea a zawm thu hi niminah tawitein kan rawn tarlang zuai tawh a, premier leaque huanga player inhralh chungchanga players hralhna man tam ber ‘British Record Fee’ a nih thu leh kum 5 leh a chanve vel atan he Liverpool striker hian contract a ziah thu kan tar bawk.

Liverpool-ah Andy Carrol: Torres an hralh chuan a hmunruak hnawhkhattu tur an neih nghal a ngai tih Liverpool hian an hre chiang a. Newcastle atangin Andy Carrol an lalut ve nghal a, Torres-a man an dawn atang khan pound maktaduai 35 an sawk thla a, England striker Carrol-a leina’n hian an hmang ve thung. Carrol an leina hi Liverpool mai bakah British transfer record-ah Torres tiam lovin a sang ber ve nghal a, hmana Ferdinand te, Rooney te, United-in an leina ai khan a sang hret a, an ni kha maktaduai 31 leh 25.6 niin, Beckham te pawh kha United-in Real Madrid hnena an hralhchhuah khan pound maktaduai 25 chauh (?) a ni.

Luis Suarez pawh: Liverpool-in Andy Carrol chauhah an ngaih an la ti tha ngam chiah lova, midang pawh an lalut lehnghal. Chu an player lei, pound maktaduai 22.8 man chu Uruguay Ajax forward Luis Suarez a ni. Kum 2007-a Liverpool-in pound maktaduai 20-a Torres an lei khan an club-in player mal leina’na an sum hman tam ber record a ni a, thil a danglam ta hle. Torres-a an vulh thau zet hnua an kg lehnaah hian pound maktaduai 30 an hlep a, tuna kum 24 mi Suarez leh Andy Carrol te an leina hi Torres-a record fee ai khan a sang zawk ve ve tawh a, Torres an lilamnaa an ‘ei’ atanga an lei an ni a, hetianga hlep tur nei hian an ni hi an vulh thei ve ang em? tih chauh a ni tawh.

Torres-a bulah Luiz: Chelsea-in Fernando Torres leina’n khati zat kha sum an thehchhuak a, defence lama ding tur pakhat leina’n pound maktaduai 25 an phawrhchhuak leh bawk a, chu an defender lei tak chu Benfica defender David Luiz a ni. Kum 23 mi lek Luiz hian Torres ang thovin kum 5 leh a chanve chhung atan a inziaklut a. An pahnih leina’na Chelsea sum hman hi pound maktaduai 75 a ni tihna a ni!. Cristiano Ronaldo man an pha teuh khups mai!.

Comments

Popular posts from this blog

Lirthei 1712 Registered

B.TEII HOVIN INDIA TEAM