Malaria-ah Enge Kan Dinhmun?.Thihpui an pung. kuminah 1

Ltp. 24th.March. 2010:  Nimin khan I&PR Conference Hall, Mamitah Malaria chungchang zirhona leh sawihona hun neih a ni a. Hetah hian Mamit District-ah kum 2008 khan Malaria vanga thi 13 an awm laiin nikum 2009 khan mi 15-in an thihpui tih tarlan a ni a. Kuminah mi 1-in a thihpui leh tawh tih tarlan a ni bawk.
He ‘Advocacy Meeting on Malaria’ hi Dr.Vanlalfela, District Malaria Officer, Mamit District-in a kaihruai a, Pu A.Biaklawma, District Bawrhsap chu khuallian niin, khuallian chuan Malaria laka kan him theihna’n chhung kua, khawtlang leh Pawl angah te uar zawka Malaria chungchang kan inzirtir hi a tul a ni, a ti a, he natna hi sual sim lova pianthar ang deuh a ni a, a reh tawh emaw kan tih tawh hnuah te hian natna dang kai chhuaktuah a tan leh thin avangin mar pata a invenna lamah tan kan lak a tul a ni, a ti bawk.
‘Life Cycle of Mosquito & Mode of transmission of Malaria’ tih chungchang sawitu Dr.Chawngthansiami, CMO, Mamit District-in Malaria chungchanga hriat tur pawimawh chi hrang hrang leh Thosi atanga Malaria lo chhuah dan te, Malaria natna lo lanchhuah dan, a inven dan leh Malaria chungchanga hriat tur chi hrang hrang a tarlang a. July to November thla chu Malaria thlentu Thosi inthlahpun hun lai a nih thu leh a tlangpuiin khawsak hniam lam, faina kawng a inthlahdah deuhte zingah he natna hi a tam bik thu sawiin, CMO chuan, Mamit, Lawng tlai, Kolsib leh Lunglei District te chu Malaria natna tamna district-a ngaih an nih avangin Global Funding Aids Tuberculosis Malria (GFATM) hnuaiah enkawlna bik dawngin, tunlai Malaria damdawi tha ber zinga mi ACT pawh a thlawna sem a nih thu a sawi a ni.
Dr.Vanlalfela, District Malaria Officer-in Mamit District chhunga Malaria an dona kawnga an hmalaknate tarlangin, Mamit District chhung ah District Hospital 1, CHC-1, PHC-7, Sub-Centre-30, Sub-Centre Clinic (sawrkar-in a la recommened loh)-3, FTD-125 leh ASHA-65 bakah GFATM hnuaiah Malria Technical Super viser-1 an neih thu a tarang a. An hmalakna tlangpuiah Thosilen sem, DDT kah leh Thosilen chiah te an nih thu sawiin, 2008 chhung khan Thosilen 13000 leh 2009-ah 12012 bakah nikuma Bru buaina avang khan Bru te hnen ah thosilen 1162 an sem bawk thu a sawi a, 2008 khan Damdawi hmang in Thosilen 29027 an chiah thu leh 2009 khan 17370 an chiah thu a tarlang bawk.
Dr.Fela’n a report atanga a lan dan chuan, 2008 khan Mamit District-ah  thisen endik 27067-ah Malaria vei 2089 hmuhchhuah an ni a, 2009-ah thisen endik 33231-ah Malaria vei 2647 niin, 2008 khan mi 13-in an thihpui a, nikum 2009 khan mi 15-in an thihpui thung. Mamit khawpui bikah kum 2008 khan Malaria vang hian mi 3 an thih laiin, nikum khan mi 4-in an thihpui leh a, kumin 2010 kum kal mekah hian mi pakhat a thi leh tawh bawk niin report-ah hian tarlan a ni.

Comments

Popular posts from this blog

Lirthei 1712 Registered

B.TEII HOVIN INDIA TEAM